काठमाडौं पेप्सीकोलास्थित सनसिटी अपार्टमेन्टमा बस्ने एकै परिवारका तीन जना सदस्यमा गरिएको र्यापिड डाइग्नोस्टिक टेस्टबाट उनीहरुमा काेराेना संक्रमण भएको संभावना देखिएपछि पाटन अस्पताल भर्ना गरिएकाे छ।
उनीहरूमा र्यापिड टेस्ट गर्दा काेराेना भाइरसकाे एन्टीबडी देखिएका कारण तीनै जनालाई पाटन अस्पतालको आइसोलेसनमा भर्ना गरिएको अस्पतालका निर्देशक डाक्टर विष्णु शर्माले जानकारी दिए।
पाटनको आइसोलेसनमा भर्ना भएका उनीहरुको पीसीआर परीक्षणका लागि टेकुस्थित जनस्वास्थ्य प्रयोगशालामा पठाइएको छ। साधारणतया र्यापिड डायग्नोस्टिक टेस्ट किटको परीक्षण शतप्रतिशत पक्का मानिदैन । त्यसैले चिकित्सकहरुले पीसीआर परीक्षणका लागि पठाउँछन्।
बागलुङ बिहुंकी महिलालाई शनिबार र्यापिड डायग्नोस्टिक टेस्ट किटबाट परीक्षण गर्दा कोरोना पोजेटिभ देखाएको थियो। तर पोखरास्थित ल्याबमा उनको पीसीआर परीक्षण गर्दा सोमबार नेगेटिभ देखाएको छ।
यापिड डायग्नोस्टिक टेस्ट किटबाट जाँच गर्दा कोरोना देखिएपछि उक्त अपार्टमेन्ट परिसरलाई प्रहरीले ‘लकडाउन’ गरेको छ। उनीहरुलाई अस्पताल पठाएपछि आवतजावत बन्द गरिएको सो अपार्टमेण्टमा चारसय भन्दा बढी परिवार बसोबास गर्दै आएका छन्। त्यहाँ बस्ने अन्य परिवारको पनि स्वास्थ्य परीक्षणको तयारीमा स्वास्थ्य मन्त्रालय जुटेको छ।
