उदयपुर – उदयपुर जिल्लाको त्रियुगा नगरपालिका–३ भुल्केस्थित मस्जिदमा १२ जना भारतीय नागरिक सहित ४ जना नेपाली लुकेर बसेको पाइएको छ। स्थानीय नगारिकको सुचनाको आधारमा उनीहरु मस्जिदमा बस्दै आएको पाइएको हो।
उनीहरूले लकडाउनअघि नै आएको दाबी गरे पनि स्थानीयले भने लकडाउनपछि चोरबाटोबाट आएको हुन सक्ने बताएका छन् ।
स्थानीयको सुचनाका आधारमा अनुगमन गर्दा भारतीयको परिचयपत्र सहितका १२ जना र ४ जना नेपाली रहेको पाइएको प्रमुख जिल्ला अधिकारी दीपककुमार पहाडीले बताए ।
प्रजिअ पहाडीका अनुसार मस्जिदमा बस्दै आएका भारतीय सहित नेपालीको पनि र्यापिड टेस्ट गर्दा कोरोना संक्रमण नेगेटिभ देखिएका कारण सोही स्थानमा सामाजिक दुरी कायम गरि बस्ने गरि स्वाब कलेक्सन गरि पठाईएको छ। उनका अनुसार १६ जनालाई मस्जिदमै सुरक्षा निकायको निगरानीमा राखिएको छ ।
उनीहरू सप्तरीमा फागुन ५ गते आयोजित सम्मेलनमा सहभागी हुन आएको अनुमान गरिएको छ । स्वाब संकलनसँगै तिनीहरूको ‘ट्राभल हिस्ट्री’ पनि खोज्न सुरु गरिएको प्रजिअ पहाडीले बताए ।
