उदयपुर – आज कोरोनाको पुष्टि भएका १२ जनालाई एम्बुलेन्स मार्फत विराटनगर पठाइएको छ। उदयपुरको त्रियुगा नगरपालिका–३, भुल्केस्थित मस्जिदमा बसेका १२ जनामा कोरोना संक्रमण पुष्टि भएपछि आज बिराटनगर पठाइएको हो।
बिराटनगरको कोशी अञ्चल अस्पतालमा गरिएको पिसिआर परीक्षणमा उनीहरुमा कोरोना पोजिटिभ देखिए पछि थप परिक्षणका लागि काठमाडौंको टेकुस्थित जनस्वास्थ्य प्रयोगशालामा गरिएको परीक्षण पनि पोजिटिभ देखिएको थियो।
उदयपुरका भेटिएका १२ संक्रमित सबै पुरूष र उनीहरूको उमेर ३४, २९, २६, २८, २८, २८, २८, २२, २५, २०, ४० र २९ बर्ष रहेको छ ।
संक्रमितहरु उदयपुर नगरपालिका-३ स्थित भुल्केमा रहेको मस्जिदमा भेटिएका थिए । मस्जिदमा नयाँ मानिसहरु देखेपछि स्थानीयले खबर गरेका थिए ।
सुरुको र्यापिड टेष्टमा सबैको रिपोर्ट नेगेटिभ आएका कारण सोही स्थानमा सामाजिक दुरी कायम गरि बस्ने गरि स्वाब कलेक्सन गरि बिराटनगर पठाईएको थियो।
एकै पटक १२ जनालाई कोरोनाको संक्रमण देखिएपछि उदयपुर सबैभन्दा बढी कोरोना भाइरस संक्रमित भएको जिल्ला भएको छ। हाल नेपालमा कोरोना संक्रमितको संख्या ३० पुगेको छ ।
