विश्वभर कोरोना भाइरसका कारण ज्यान गुमाउनेको संख्या २ लाख ५० हजारको निकट पुगेको कोरोनाको अपडेट गर्दै आएको वोर्ल्डोमिटरले जनाएको छ। यस्तै संक्रमितको संख्या ३५ लाख लाख नाघेको छ।
मृत्यु हुने र संक्रमितको संख्यामा बढेको देखिए पनि दैनिक थपिने संक्रमित र मृतकको संख्या भने कम हुँदै गएको देखिएको छ।
पछिल्लो विश्व विवरण अनुसार धेरै संक्रमितहरू उत्तर अमेरिका र युरोपेली मुलुकबाट रहेका छन्। यस्तै ल्याटिन अमेरिका, अफ्रिका र रसियामा संक्रमितको संख्या बढिरहेको छ।
पछिल्लो २४ घण्टामा विश्वमा ८४ हजार ४ जना नयाँ संक्रमित थपिएको वोर्ल्डोमिटरले जनाएको छ। हाल रहेका कुल संक्रमित मध्ये ९८ प्रतिशतलाई मध्यम किसिमको कोरोना संक्रमण रहेको र २ प्रतिशतको अवस्थामात्रै गम्भीर छ।
यसैगरी साढे ११ लाख बढी मानिस निको भइसकेका छन्। अमेरिकामा मात्र भाइरसका कारण ६८ हजार बढीको ज्यान गैसकेको छ भने निकट १२ लाखको हाराहारीमा संक्रमण पुष्टि भएको छ।
