देशभरिमा आइतबार २४ जना कोरोना संक्रमित थपिएका छन्। यो सँगै नेपालमा कोरोना संक्रमितको संख्या ६ सय ८ पुगेको छ। आइतबार साँझ मात्र बाँकेका ४ र बर्दियाका एक गरी ५ जना संक्रमित थपिएका हुन्। यो विवरण भने स्वास्थ्य मन्त्रालयले औपचारिक जानकारी गराएको छैन।
यसबाहेक आइतबार थपिएका संक्रमितहरूमा रुपन्देहीका ६ जना, पर्साका ३ जना, कपिलवस्तुका ३ जना, काठमाडौं, झापा, बारा, रौतहट, सर्लाही, नुवाकोट र गुल्मीका एक-एक जना छन्।
यीमध्ये नुवाकोटमा पहिलोपटक संक्रमण देखिएको हो। जिल्लाको ककनी गाउँपालिका-३ का स्थानीय पुरुषमा संक्रमण देखिएपछि उनी टेकु अस्पताल भर्ना भएका छन्।
कोरोनाबाट निको हुनेको संख्या १ सय ४ पुगेको छ। शनिबार मात्र नारायणी अस्पतालबाटै ९ जना र रुपन्देहीको कोरोना अस्पतालबाट १० जना निको भएका थिए।
अहिलेसम्म नेपालमा कोरोनाबाट तीन जनाको मृत्यु भएको छ। जसमा सिन्धुपाल्चोक, गुल्मी र बाँकेका एक-एक जना हुन्।
