उदयपुर । अनेरास्ववियु उदयपुरको १६ औं जिल्ला अधिवेसनमा भाँडभैलो मचिएको छ । बिहिबार दिउँसो उद्घाटन सत्रको कार्यक्रम सकेर बन्दसत्र मार्फत नयाँ नेतृत्व घोषणा गर्ने क्रममा आकांक्षी मध्यका केहिले असन्तुष्टि जनाए पछि विवाद सिर्जना भएको थियो ।
अनेरास्ववियुका जिल्ला ईन्चार्ज सुरेन्द्र बस्नेतको अध्यक्षतामा रहेको अध्यक्ष मण्डलले प्रवेश ठकुरीको अध्यक्षतामा नयाँ नेतृत्व घोषणा गरेको थियो । अध्यक्ष मण्डलले अध्यक्षमा प्रवेश ठकुरी, उपाध्यक्षमा सन्तोष काफ्ले, सचिवमा सुवास ज्यू ठकुरी, उपसचिवमा युवराज दाहाल, श्रद्धा भट्टराई र सृष्टिका कोईराला, कोषाध्यक्षमा अनिल घिमिरेको नाम घोषणा गरेको थियो ।
अध्यक्ष मण्डलका सदस्य हेम खड्काले नामावली घोषणा गर्ने क्रममा निर्णय चित्तबुझ्दो नभएको भन्दै अध्यक्षका प्रत्यासीहरु र असन्तुष्ट पक्षले नाराबाजी र होहल्ला गरेका थिए । असन्तुष्ट पक्षले होटल टाउन हलमा रहेको रोष्टम, कुर्सी लगायतका सामाग्री तोडफोड गरेका छन् ।
विवाद बढेपछि बन्दसत्रको सम्पूर्ण कार्यक्रमहरु स्थगित भएको छ । बन्दसत्रमा लफडा भएपछि टाढा टाढा बाट आएका सहभागी तथा प्रतिनिधिहरु अलपत्र परेका छन् ।
