उदयपुर । बिदेशी विशेषज्ञ डाक्टर सहित चौदण्डी र बेलका नगरपालिकामा गरिएको स्वास्थ्य शिविरमा अप्रेसन गर्न पर्ने देखिएका बिरामीलाई अप्रेसनका लागि जिल्ला अस्पताल रिफर गरिएको छ । जिल्ला अस्पतालमा आंङ खसेको महिला, पाठे घरको समस्या देखिएका महिला र हर्निया लगायतको उपचार अप्रेसनको सुविधा थपिए पछि विरामीलाई रिफर गरिएको हो ।
लुम्बिनी गार्डेन फाउण्डेशन स्पेन नेपालको संयोजनमा स्पेन स्थित रुवर इन्टरनेशनल डि मेडरिड अस्पताल र काठमाडौ स्थित स्टार अस्पतालका बिशेषज्ञ डाक्टरको टोलीले उदयपुरको बेलका नगरपालिका र चौदण्डीगढी नगरपालिकामा निःशुल्क स्वास्थ्य शिविरको संचालन गरेको थियो ।
शिविरमा २ हजार बढी बिरामीहरुको स्वास्थ्य चेकजाँच गरिएको स्टार अस्पतालका एमडी डा. शैल रुपाखेतीले बताए । स्वास्थ्य चेकजाँचमा अप्रेसन गर्नु पर्ने देखिएका बिरामीलाई अप्रेसनको लागि जिल्ला अस्पताल उदयपुर रिफर गरिएको रुपाखेतीले बताए ।
“जिल्ला अस्पतालमा अहिले हामीले शिविरमा चेकजाँच गरेका सम्पुर्ण रोगको उपचार र अप्रेसन हुने बुझियो ” डा रुपाखेतीले भने, “जिल्ला अस्पतालको व्यवस्थापन र महत्त्वपूर्ण विशेषज्ञ डाक्टरहरु हुनुहुदो रहेछ यो ठाउँमा सबैभन्दा आवश्यक पर्ने विशेषज्ञ डाक्टर यहाँ पाइनु ठूलो उपलब्धि हो जिल्ला अस्पतालको गौरवको कुरा हो ।”
आंङ खसेको र पाठेघरको समस्या देखिएका महिला तथा हर्निया लगायत अन्य गरेर ११ जनालाई अप्रेसनको लागि जिल्ला अस्पताल ल्याइएको जिल्ला अस्पतालका मेडिकल सुपरिटेन्डेन्ट ज्ञानेन्द्र झाले जानकारी दिए ।
