गाईघाट – त्रियुगा नगरपालिका वडा नं ८ स्थित राजावास-बैरेनी-भान्टाबारी जोड्ने सडक अन्तर्गत शाहीखोलामा पक्की पुल बन्ने भएको छ। निर्माण हुन लागेको पक्की पुलको त्रियुगा नगर प्रमुख बसन्त कुमार बस्नेतले शिलान्यास गर्नु भएको हो ।
२०८२ साल बैशाख १२ गते निर्माण सम्पन्न गर्ने गरी हिम निर्माण सेवाले ४ करोड ५१ लाख २५ हजार ५ सय ७४ रुपैयाँमा पुलको ठेक्का लिएको छ ।
सिंगल स्पाम भएको ४० मिटर लामो मोटरेवल पुल दुई लेनको हुनेछ। राष्ट्रिय योजना आयोग मार्फत समपुरक कोषबाट पुल निर्माणका लागि बजेटको व्यबस्था भएको हो।
पुलको शिलान्यास गर्दै नगर प्रमुख बस्नेतले गाउँको विकासका लागि सडक, बिजुली अति आवश्यक रहेको बताउँदै बन्ने पुल त्रियुगा रिङरोडको अवधारणा अनुसार बन्न लागेको बताउनु भयो ।
शाहिखोलाका स्थानीयको मागबमोजिम व्यस्त सडकखण्डको शाहीखोलामा पुल निर्माण भएपछि सहजरूपमा यातायात सञ्चालन भई जनताले ठूलो राहत पाउने नगर प्रमुख बस्नेतले धारणा व्यक्त गर्नु भयो।
