उदयपुर । त्रियुगा नगरपालिकाका विभिन्न १३ वटा योजनालाई अति आवश्यक योजना अन्तर्गत राखेर भौतिक पूर्वाधार मन्त्रालयले आउदो आर्थिक बर्षको बजेट बनाउने भएको छ। त्रियुगा नगरप्रमुख बसन्त बस्नेतको सिफारिसमा मन्त्रालयले आउदो आर्थिक बर्ष २०८०/८१ मा नगरका बहुउदेश्यीय १३ वटा योजना समेटेर बजेट बनाउने भएको हो ।
विभिन्न कामको शिलशिलामा काठमाडौंमा रहदा मेयर बस्नेतले मन्त्रालयमा पुगेर मन्त्री सहित सचिवलाई भेटेर नगरपालिकाका मुख्य योजनाहरुको माग गर्दै आएका थिए ।
पूर्वाधार मन्त्रालयमा अति आवश्यक भित्र परेका योजनामा गाईघाट फत्तेपुर सडक खण्डमा पर्ने खोलामा पक्की पुल, त्रियुगा नगरपालिका वडा नं १३ बाट निर्माणधीन सगरमाथा विमानस्थल जोड्न त्रियुगा नदिमा पक्की पुल लगायत रहेका छन ।
पटकपटक मन्त्रालय यिनै योजनाका लागि पुगेका मेयर बस्नेतले उप प्रमुख महेश्वरी राई र प्रमुख प्रशासकीय अधिकृतलाई समेत मन्त्रालय पुर्याएर नगरपालिकाको अवस्थाथाको बारेमा अवगत गराएका थिए ।
मेयर बस्नेतले भौतिक पूर्वाधार सहित शहरी बिकास मन्त्रालय मार्फत त्रियुगा रिङ्गरोड र बरुवा त्रियुगा करिडोर निर्माणका लागि समेत अति आवश्यक भित्र बजेटको माग गरेका छन ।
