उदयपुर । उदयपुरको त्रियुगा नगरपालिकाले उच्च शिक्षा पढ्ने छात्राहरूलाई साइकल वितरण गरेको छ । त्रियुगा नगरपालिका वडा नं २ का २९ जना उच्च शिक्षा पढ्ने लक्षित वर्गका दलित तथा जनजाती छात्राहरूलाई साइकल वितरण गरेको हो।
किशोरीहरूलाई उच्च शिक्षा हासिल गर्न जान आउन सहज होस र उनीहरू प्रोत्साहित होउन भन्ने उद्देश्यले साइकल वितरण गरिएको त्रियुगा नगरपालिकाका मेयर बसन्त बस्नेतले बताउनु भयो ।
मेयर बस्नेतले सीमान्तकृत समुदायका किशोरीहरू साधारण कक्षा पढेपछि विभिन्न कारणले उच्च शिक्षा हासिल गर्न नसकेको समस्यालाई ध्यान दिदै नगरपालिकाले शैक्षिक छात्रवृति कोष स्थापना गरि निशुल्क पठनपाठन गर्ने व्यावस्था गरिएको बताउनु भयो ।
त्रियुगा वडा नं २ को कार्यालयमा भएको साइकल वितरण कार्यक्रममा मेयर बस्नेत सहित उपमेयर महेश्वरी राई, वडा अध्यक्ष घमान सिंह खत्री लगायत वडाका अन्य जनप्रतिनिधि उपस्थित थिए।
साइकल पाएपछि छात्राहरुले खुशी हुँदै अब कुनै पनि हालतमा अध्ययन नरोक्ने बताए । साइकल नहुँदा यहाँका बालबालिका ४ किलोमिटरको पैदल हिँडी उच्च शिक्षा लिन जाने गरेका थिए ।
