उदयपुर : टर्कीका भूकम्प पीडित सहयोगार्थ ‘गाईघाट कोरा साइक्लिनिङ च्यालेन्ज २०२३’ हुने भएको छ।
त्रियुगा नगरपालिकाको सहयोग तथा उदयपुर साइक्लिनिङ संघको आयोजनामा असार ३० गते पाँचौ संस्करणको कोरा च्यालेन्ज गर्न लागिएको हो।
संघका अध्यक्ष जितेन्द्र रोइलाका अनुसार यसपटकको कोरामा ५० दशमल ५० किलोमिटरको यात्रा तय गरिएको छ। सदरमुकाम गाईघाटबाट सुरु हुने कोरा त्रियुगा नगरपालिका मोतिगडा-वगाहा-देउरी-जलजले-चुहाडे-राजाबास हुँदै पुनः गाईघाटमै आइपुगेर टुंगिने गरी रुट मिलाइएको उनले बताए।
करिब ५ घण्टाको यात्रा हुने कोरामा त्रियुगा, बेलका र चौदण्डीगढी नगरपालिकाका एक सय ५ जनाले सहभागिता जनाउने छन। उदयपुरमा साइक्लिनिङ गर्नेको संख्या बढ्दै गएको र साईक्लिनिङ गर्नेमा युवा र बालबालिकाको आकर्षण बढ्दै गएको अध्यक्ष रोइलाले जानकारी दिए ।
वर्षमा एकपटक मठ–मन्दीर, चैते, गुम्बा, मस्जिद घुम्दै घडीको आकारमा साइक्लिनिङ गर्नुलाई कोरा साइक्लिनिङ भनिन्छ । यो कोरा च्यालेन्ज उदयपुरमा सन् २०१९ बाट सुरु भएको हो ।
