उदयपुर । त्रियुगा नगरपालिकाले जिल्ला अस्पताल बोक्सेमा हेल्प डेस्क अर्थात बिरामी सहायता कक्ष स्थापना गरेको छ । नेपाल रेडक्रस सोसाइटी त्रियुगा नगर शाखाले आफ्नो जनसम्पर्क कार्यालय स्थापना गरेको हो ।
बुधबार जिल्ला अस्पतालमा जनसम्पर्क कार्यालयको औपचारिक रुपमा प्रारम्भ गर्दै उक्त कार्यक्रमका प्रमुख अतिथि तथा त्रियुगा नगरपालिकाका मेयर बसन्त बस्नेतले स्वास्थ्य क्षेत्रलाई प्राथमिकतामा राखेर र यहाँ उपचार गर्न आउने विरामीकालागि रगतको अभाव हुन नदिन बल्ड बैंक सहितको सेवा उपलब्ध गराउन जन सम्पर्क कार्यालय संचालन गरिएको बताए ।
नगर प्रमुख बस्नेतले त्रियुगा नगरपालिका सधै जनताको स्वास्थ्यमा संवेदनशील रहेको र हरेक नागरिकले सहज रुपमा स्वास्थ्य उपचार पाउन पर्नेमा आफू लागि परेको बताए ।
उदयपुर जिल्ला अस्पतालका मेडिकल सुपरिन्टेन्डेन्ट डा. ज्ञानेन्द्र झाले उदयपुर जिल्ला अस्पताल कोशी प्रदेशकै उत्कृष्ट अस्पतालमा परेकोले अस्पतालको थप सेवा सुविधा तथा पूर्वाधार तयार पार्ने काममा रेडक्रसको ब्लड बैंक र जनसम्पर्क कार्यालयले पनि ठूलो मद्दत गर्ने बताउनु भयो ।
नेपाल रेडक्रस सोसाइटी त्रियुगा नगर शाखाका सभापति अमृत हमालको अध्यक्षतामा भएको सो कार्यक्रममा रेडक्रस जिल्लाका पदाधिकारी तथा नगर शाखाका पदाधिकारी सदस्यहरुको उपस्थिति रहेको थियो ।
