गाईघाट । वन मुद्धामा दोषी ठहर भएका एक जनालाई उदयपुर प्रहरीले पक्राउ गरेको छ । जिल्ला प्रहरी कार्यालय उदयपुरबाट खटिएको टोलीले त्रियुगा नगरपालिका वडा नं १२ सोनापुरका कुशेश्वर चौधरीलाई पक्राउ गरेको हो ।
वन मुद्दामा २० दिन कैद र २३ हजार ६ सय जरिवानामा भएका चौधरीलाई पक्राउ गरी फैसला कार्यान्वयनको लागि जिल्ला अदालात उदयपुरमा लगिएको प्रहरीले जनाएको छ ।
चौधरीलाई दण्ड, जरिवाना,असुल गरि बाँकी कैद भुक्तानका लागि कारागार चलान गरिने छ । विभिन्न अपराध एवं मुद्दामा संलग्न रही फरार रहेका तथा अदालतबाट फैसला भई दण्ड, जरिवाना, दसौदी, कोर्ट फि र सरकारी बिगोसमेत तिर्न बाँकी भएका व्यक्तिको खोजीकार्यलाई प्रहरीले तीव्र पारेको छ ।
गएको ३ महिना देखि उदयपुर प्रहरीले सक्रियरुपमा सवारी ज्यान, ज्यान मार्ने उद्योग, बहुविवाह, लागुऔषध, अवैध काठ ओसारपसार लगायतका मुद्दामा अदालतबाट सजाय पाएर फरार रहेका प्रतिवादीलाई पक्राउ गरि रहेको छ ।
