उदयपुर । उदयपुरको सदरमुकाम गाईघाटमा आजबाट प्रथम गाईघाट जुत्ता चप्पल महोत्सवको त्रियुगा नगरपालिकाका मेयर बसन्त बस्नेतले उद्घाटन गर्नु भएको छ । महोत्सवको उद्घाटन गर्नु हुदै नगरप्रमुख बस्नेतले स्वदेशी उत्पादनको प्रयोगलाई बढाएर विदेशी उत्पादनलाई बजारबाट विस्थापन गर्दै लैजानु पर्ने बताउनु भयो ।
नेपाली जुत्ता चप्पल उत्पादक समुहद्वारा आयोजित महोत्सवमा ५ ब्राण्डका जुत्ता चप्पल बिक्री तथा प्रदर्शनीमा राखिएका छन । नेपालमा उत्पादन हुने सबै जुत्ता चप्पल उद्योगका उत्पादनहरु एकै ठाउँमा बिक्री तथा प्रदर्शन गर्ने नीति अनुरुप महोत्सव आयोजना गरिएको छ ।
चैत्र ७ गते बुधबारबाट शुरु भएर महिना भरी संचालन हुने जुत्ता चप्पल महोत्सवमा ५० हजारले महोत्सव अवलोकन गर्ने र सो अवधिमा करीब ६० लाखको व्यापार हुने अनुमान गरिएको आयोजकले जनाएको छ ।
नेपालमा करीब १५ सय जुत्ता चप्पल उद्योग रहेको नेपाली उत्पादनको बजार प्रवद्र्धन तथा स्वदेशी उत्पादनको प्रयोगलाई प्राथमिकता दिन महोत्सवको आयोजना गरिएको जनाईएको छ । महोत्सवमा नयाँ नयाँ डिजाइनका आकर्षक जुत्ता–चप्पल सुपथ मूल्यमा उपलब्ध गराइने आयोजकले जनाएको छ । महोत्सवमा १५ देखि ५० प्रतिशतसम्म छुटको व्यवस्था रहेको छ ।
