उदयपुर । कोशी टप्पु बन्यजन्तु आरक्षमा जंगल सफारी हुने भएको छ । युवा व्यवसायी रमण भट्टराईले आरक्षमा सफारी गराउनु हुने भएको हो ।
बेलका नगरपालिका वडा नं ८ मा बेलका विच होटल संचालन गर्दै आएका भट्टराईले पर्यटन प्रवर्द्धन गर्ने उदेश्य सहित व्यवसायीक जंगल सफारी सुरु गर्नु भएको हो । जंगल सफारीको कोशी प्रदेशका मुख्य मन्त्री केदार कार्कीले उद्घाटन गर्नु भएको छ ।
बेलका नगरपालिकाको आयोजना तथा कोशी टप्पु बन्यजन्तु आरक्षको समन्वयमा भएको कार्यक्रममा मुख्यमन्त्री कार्कीले जंगल सफारीको उद्घाटन गर्नु भएको हो ।
अहिलेको आर्थिक मन्दीमा पनि प्रदेशकै नाम चिनाउन र पर्यटन प्रवर्द्धन गर्ने उदेश्य सहित जंगल सफारीको सुरुवात गराएकोमा भट्टराईलाई मुख्यमन्त्री कार्कीले धन्यवाद ज्ञापन गरे । धार्मिक हिसाबले पनि महत्वपुर्ण मानिने चतराक्षेत्रमा आउने पर्यटकलाई जल तथा जंगल सफारीले पर्यटन प्रवर्द्धन मात्र नभएर यस क्षेत्रको पहिचानलाई अझ माथी पुर्याउने मुख्यमन्त्री कार्कीले बिश्वास व्यक्त गर्नु भयो ।
धार्मीक र ऐतिहासिक मानिने चतराधाममा आउने पर्यटकलाई कोशी टप्पु आरक्षमा वन बिहार गराएर मनोरञ्जन दिने उदेश्य सहित जंगल सफारी संचालन गरिएको हो । बिश्वमै सवै भन्दा बढी चराचुरुङ्गी पाइने, लोपोन्मुख अर्ना र सिमसार क्षेत्रमा डल्फीन समेत पाइने हुँदा कोशी टप्पुमा जंगल सफारी गर्न उत्कृष्ट मानिन्छ ।
उद्घाटन कार्यक्रममा बोल्दै त्रियुगा नगरपालिकाका नगर प्रमुख वसन्त बस्नेतले पर्यटन प्रवद्धन गर्न उदयपुरको बराहक्षेत्रधाम, रौतापोखरी, ऐतिहासिक गढीहरुलाई उत्कृष्ट गन्तव्य स्थामा सुचिकृत गर्दै लगानी गर्न मुख्य मन्त्री सँग आग्रह गर्नु भयो ।
यस्तै बेलका नगरपालिकाका नगर प्रमुख अशोक कार्कीले चतरा पर्यटनको उचित गन्तव्य भएका कारण यसलाई उत्कृष्ट गन्तव्य स्थानका रुपमा सुचिकृत गरि यसको प्रचार प्रसार गरिदिने प्रदेश सरकारलाई अनुरोध गर्नु भयो । प्रमुख कार्कीले प्याराग्लाईडिङ, कोशीमा जलयात्रा र कोशी टप्पुमा जंगल सफारी र धार्मिक र ऐतिहासिक क्षेत्र यही भएकाले यो क्षेत्रलाई उत्कृष्ट गन्तव्य स्थानका रुपमा सुचिकृत गरि यहाँको भौतिक बिकासमा सहयोग गर्न मुख्यमन्त्री कार्कीलाई आग्रह गर्नु भयो ।
