उदयपुर । उदयपुरबाट संचालन हुने लामो दुरीका सवारी साधनमा सिसिटिभी र जिपिएस अनिवार्य जडान गर्नु पर्ने उदयपुर प्रहरीले अभियान शुरु गरेको छ ।
यातायात व्यवसायी र ट्राफिक प्रहरीको सहकार्यमा दुर्घटना न्युनिकरणका लागि गाईघाटबाट चल्ने लामो दुरीका सार्वजनिक यातायातमा क्यामेरा र जिपिएस जडान गरिएको हो ।
हाललाई साना ठुला गरी ११ वटा सवारी साधनमा प्रबिधि जडान गरि शुरु गरिएको जिल्ला प्रहरी कार्यालय उदयपुरले जनाएको छ ।
‘सार्वजनिक यातायातमा प्रविधिको प्रयोग, जनधनको क्षति र दुर्घटना न्युनिकरणमा सहयोग’ भन्ने नाराका साथ सुरू भएको प्रविधि जडान गर्ने अभियान अन्तरगत जिल्लाका सबै प्रकारका यातायातका साधनमा जडान गरिने जिल्ला प्रहरी प्रमुख प्रहरी उपरीक्षक रमेश थापाले जानकारी दिनु भयो ।
सिसिटिभि जडान कार्यविधि २०७२ अनुसार व्यक्तिको स्वतन्त्रता र गोपनियतालाई मध्यनजर गर्दै यातायात व्यवसायीले अपनाउनु पर्ने विशेष सतर्कता र सुरक्षा सम्बन्धी प्रहरी र यातायात व्यवसायी बिच समझदारी समेत भएको छ ।
प्रविधी जडान अभियानको आज एक समारोह बिच कोशि प्रहरी प्रमुख तथा प्रहरी नायव महानिरीक्षक चन्द्र कुबेर खापुङ र त्रियुगा नगरपालिकाका नगरप्रमुख वसन्त कुमार बस्नेतले शुभारम्भ गर्नु भयो ।
जिपिएस र सिसिटिभि जडानले दुर्घटना नियन्त्रण हुने र सवारी साधन भित्र हुने हिंसा, अपराध जस्ता कार्य पनि न्यूनीकरण भएर जाने नगर प्रमुख बस्नेतले बताउनु भयो ।
