उदयपुर । सोमबार रातिदेखिको निरन्तर वर्षाका कारण त्रियुगा नगरपालिका–१५ तोरीबारीमा पहिरोमा परी एकजनाको मृत्यु भएको छ भने अन्य दुईजना घाइते भएका छन् । जिल्ला प्रहरी कार्यालय उदयपुरका अनुसार ८ बर्षीय रुपकला मगरको मृत्यु भएको तथा ४० वर्षीया हीरामाया मगर र निजका सात वर्षीय छोरा योगेश मगर घाइते भएका हुन् । घाइते भएका उनीहरूको स्थानीय अस्पतालमा उपचार भइरहेको छ ।
पहिरोले ४/५ वटा घरमा पूर्ण क्षेती पुर्याएको छ भने अन्य १०/११ घर पहिरोको उच्च जोखिममा छन । जोखिममा परेकाहरूलाई अन्य घर परिवारलाई पनि नजिकैको बिद्यालयमा सारिएको वडाअध्यक्ष गणेश तिम्सिनाले बताए । पहिरोले घर बिस्थापित भएर बिद्यालयमा बस्दै आएका परिवारलाई खान र बस्ने राहतको सामान सहित त्रियुगा नगर पालिकाका प्रमुख बसन्त बस्नेत पुग्नु भएको छ । नगरपालिका र विभिन्न संघ संस्थाको सहयोगमा खाद्यान्न, लता कपडा, त्रिपाल र म्याट्स लिएर नगर प्रमुख पिडित परिवार कहाँ पुग्न भएको हो ।
