उदयपुर । उदयपुरका आठ पालिका मध्ये त्रियुगा नगरपालिकाको स्वास्थ्य शाखा जिल्लाकै उत्कृष्ट स्वास्थ्य शाखा बन्न सफल भएको छ । भने लिम्चुङबुङ गाउँपालिका आठौं नम्बरमा परेको छ ।
स्थानीय तहहरुबाट आ.व. २०८०/०८१ मा सञ्चालित स्वास्थ्य कार्यक्रमहरूको मूल्यांकनमा त्रियुगा नगरपालिकाको स्वास्थ्य शाखा उत्कृष्ट बनेको हो ।
स्वास्थ्य कार्यालय उदयपुरमा मिति २०८१।०५।२४ र २५ गते भएको जिल्ला स्तरीय वार्षिक समीक्षा गोष्ठीमा कार्य प्रगतिको मुल्याङ्कनमा ८ वटै स्थानीय तहहरू मध्य त्रियुगा नगरपालिका प्रथम स्थान हासिल गर्न सफल भएको स्वास्थ्य कार्यालयका सूचना अधिकारी चिरन्जीवी निरौलाले जानकारी दिनु भयो ।
निरौलाका अनुसार स्वास्थ्य शाखाले गर्नु पर्ने कार्यहरुको विभिन्न सूचकको आधारमा कटारी नगरपालिका दोस्रो र रौतामाई तेस्रो बनेका छन ।
आधारभुत स्वास्थ्य सेवा प्रवाह, खोप कार्यक्रम, पोषण कार्यक्रम, आमा सुरक्षा कार्यक्रममा स्थानीय तहले खेलेको भुमिकाको आधारमा लिम्चुङबुङ गाउँपालिका आठौं नम्बरमा परेको छ भने बेलका नगरपालिकाले सातौं स्थान ल्याउन सफल भएको सूचना अधिकारी निरौलाले जानकारी दिनुभयो ।
उत्कृष्ट पालिकालाई स्वास्थ्य कार्यालयका प्रमुख बृज कुमार दासले मंगलबार एक समारोह विच नगरपालिका र गाउँपालिकालाई स-सम्मान प्रशंसा-पत्र प्रदान गर्नु भएको छ ।
