गाईघाट । त्रियुगा नगरपालिकाले आज देखि देउरी स्वास्थ्य चौकीलाई अस्पतालमा स्तरन्नोती गरि नगर अस्पताल संचालन गर्ने भएको छ । नगरपालिकाकै लगानीमा संचालित अस्पतालको आज संविधान दिवसको अवसर पारेर नगर प्रमुख वसन्त कुमार बस्नेतले उद्घाटन गर्नु हुने भएको छ ।
पालिकाले संचालनमा ल्याएको अस्पतालमा ओपिडी सेवा ,२४ घण्टा इमर्जेन्सी सेवा , ल्याव सेवा , बर्थिंग सेवा सहित केही विशेषज्ञ सेवा समेत दिने नगरपालिकाका जनस्वास्थ्य अधिकृत उपेन्द्र कार्कीले जानकारी दिनु भयो ।
नगर प्रमुख संचालन समितिको अध्यक्ष रहने गरि संचालनमा ल्याएको नगर अस्पतालको संचालन समितिमा नगर उपप्रमुख, प्रमुख प्रशासकीय अधिकृत, वडा नं ५ को वडा अध्यक्ष, सामाजिक शाखा प्रमुख सदस्य रहने छन ।
नगर अस्पताल मार्फत जनतालाई २४ घन्टा सेवा उपलब्ध गराई जनताको स्वास्थ्य उहाँहरुकै गाउँ घरमा गएर उपलब्ध गराउउने उदेश्यले नगर अस्पताल संचालनमा ल्याइएको नगर प्रमुख वसन्त बस्नेतले बताउनु भयो ।
नगर अस्पताल उद्घाटनको अवसर पारेर नगरपालिकाले नि:शुल्क आँखा चेकजाँचको आयोजना गरेको छ । नगरपालिकाले यस अगाडि नै सगरमाथा चौधरी आँखा अस्पतालसँग त्रियुगा नगरपालिकाका आँखा सम्बन्धि बिरामीहरुको नि:शुल्क उपचार गर्ने गरि सम्झौता गरि सकेको छ ।
