उदयपुर – उदयपुरका विभिन्न ठाउँमा रातिदेखि नै पानी परिरहेको छ । अहिले गाईघाट, बेल्टार, रामपुर र हडिया लगायतका धेरै ठाउँमा पानी परेको छ । दिउँसोपछि जिल्ला भरी नै ठूलो पानी पर्ने सम्भावना रहेको मौसम पूर्वानुमान महाशाखाले जनाएको छ ।
महाशाखाका अनुसार आजदेखि आउँदो आइतवारसम्म ठूलो पानी पर्ने सम्भावना रहेको छ । महाशाखाले विशेष बुलेटिन निकालेर आइतवार बिहानसम्म देशका विभिन्न स्थान सहित उदयपुरमा आरीघोप्टे पानी पर्ने चेतावनी दिएको हो ।
यो अवधिमा बाढीपहिरोका घटनासमेत बढ्न सक्ने भएकाले महाशाखाले उदयपुर सहित अन्य छिमेकी जिल्लालाई रेड अलर्ट रहन आग्रह गर्दै उच्च सावधानी अपनाउन आग्रह गरेको छ ।
महाशाखाले रेड अलर्ट अर्थात् उच्च सावधानी अपनाउनुपर्ने भनेर सूचीकृत गरेको जिल्लामा झापा, मोरङ, सुनसरी, धनकुटा, तेह्रथुम, खोटाङ, ओखलढुङ्गा, उदयपुर, भोजपुर, इलाम र पाँचथर रहेका छन ।
