गाईघाट । वित्तीय क्रियाकलापहरूको बारेमा ज्ञान प्रदान गराउदै वित्तीय निर्णयहरू लिन सक्ने बनाउने र व्यक्तिहरूले बैंकमा बचत खाता खोल्न, बचत गर्न, ऋण लिन, ब्याजदर, बिमा, बजार अध्ययन र वित्तीय योजनाहरू तथा निर्णयहरू गर्न सक्ने क्षमता अभिविद्धि गराउने उदेश्यले त्रियुगा नगरपालिकाले वैदेशिक रोजगारीमा गएका परिवारका सदस्य तथा विदेश जान थालेकाहरुको परिवारलाई वित्तीय साक्षरता तथा मनोसामाजिक परामर्श कक्षा सञ्चालन गरेको छ ।
त्रियुगा नगरपालिकाको सुरक्षित आप्रवासन (सामी) कार्यक्रम अन्तरगत नगरपालिकाका वैदेशिक रोजगारीमा गएर आएका र वैदेशिक रोजगारमा जान लागेका व्यक्तिका परिवारका सदस्यलाई सहभागी गराएर वित्तीय साक्षरता कक्षा साथै मनोसामाजिक परामर्श कक्षा सञ्चालन गरिएको हो ।
आम नागरिकमा आम्दानी र खर्चको हिसाब राख्ने बानीको विकास गरि बचत गर्नुपर्ने र उद्यमशील बन्नुपर्छ भन्ने भावनाको विकास गर्नका लागि वित्तीय साक्षरता कक्षा संचालन कार्यक्रमलाई टोल टोल र घर घरमा पुर्याउने उदेश्यले सवै वडामा यो कक्षा संचालन गरिदै आइएको नगरपालिकाका नगर प्रमुख बसन्त बस्नेतले बताउनु भयो।
त्रियुगा १२ पुरानो गाईघाटमा संचालित वित्तीय साक्षरता कक्षामा सहभागी मिरा राईले बैदेशिक रोजगारीमा रहेका आफन्तले पठाएको पैसा खर्च गरिसकेपछि मात्रै वचत गर्ने गर्नुभएको थियो । अब उहाँले अनिवार्य रुपमा वचत गरेर बचेको पैसा मात्रै आवश्यक ठाउँमा खर्च गर्ने योजना बनाउनुभएको छ । चार महिनासम्म वित्तिय साक्षरतामा सहभागी बन्नु भएकी राई आम्दानीबाट प्राप्त रकम पहिले बचतका लागि छुट्टाएर अनि मात्र आवश्यक खर्च गर्नुपर्ने बताउनु हुन्छ ।
घरको आम्दानी यति ,अनि खर्च यति भनेर हिसाब राख्ने नगरेको बताउने साक्षरता कक्षाम सहभागी अर्की कुमारी थापा हामीले घर चलाउँदा पनि आम्दानी र खर्चको हिसाब राख्नुपर्दो रहेछ भन्ने महसुस भएको बताउनु हुन्छ।
घरका घरमुली नरहेको अवस्थामा घर परिवारलाई कसरी व्यवस्थित राख्ने, बैदेशिक रोजगारीबाट पठाएको रकमलाई कसरी वचत गर्ने, बचत गरेको रकमलाई कसरी सदुपयोग कसरी गर्ने भन्ने बृहत बिषयमा २१ हप्ता सम्म निरन्तर कक्षा संचालन गरि प्रशिक्षक मार्फत जानकारी गराइएको सुरक्षित आप्रवासन (सामी) कार्यक्रमका संयोजक विजना बस्नेत बताउनु हुन्छ।
सही समयमा आम नागरिकले वित्तीय साक्षरता कक्षा लिन पाएका भए अहिले जसरी सहकारी र लघुवित्तका समस्या यसरी उठ्ने थिएनन् । बित्तिय साक्षरता कक्षा अहिले नागरिकको मात्र नभएर मुलुककै आवश्यक बनि सकेको छ। आम नागरिकलाई बित्तिय साक्षरता शिक्षा दिन सके मात्र राष्ट्रको अर्थ व्यवस्था सुध्रिण हुदै राष्ट्रको पुजी निर्माणमा सहयोग पुग्नेछ ।
