उदयपुर – उदयपुरमा कोरोना संक्रमितको संख्या ८७ पुगेको छ। उदयपुरको बेलका नगरपालिकामा थप २ जनामा कोरोना संक्रमण पुष्टि भएसँगै संक्रमितको संख्या ८७ पुगेको हो।
बेलका नगरपालिका ९ का ३५ वर्षीया महिला र २० वर्षीय युवामा कोरोना पोजिटिभ देखिएको हो । वीपी कोइराला स्वास्थ्य विज्ञान प्रतिष्ठान धरानको प्रयोगशालामा गरिएको पीसीआर परीक्षणबाट उनिहरुमा कोरोना पुष्टि भएको थियो।
संक्रमित ८७ मध्य २२ जना महिला र ६५ जना पुरुष रहेको जिल्ला जन-स्वास्थ्य कार्यलय उदयपुरका प्रमुख मोहन सुवेदीले बताए । संक्रमितमध्य सबैभन्दा बढी त्रियुगा नगरपालिकामा ३७ पुरुष र १३ जना महिला गरी ५० जना, बेलकामा १९ पुरुष र ५ महिला सहित २४ जना, कटारीमा ७, चौदण्डीमा नपामा १, ताप्लि गाउँपालिकामा ३ र उदयपुरगढी गापामा २ रहेका छन् ।
देशभर कोरोना संक्रमितको संख्या बढ्दै जाँदा कोरोना अब समुदाय स्तरमानै देखिन थालेको अनुमान गर्न थालिएको छ। पछिल्लो समय लक्षण सहितका कोरोना सक्रमित देखिन थालेपछि र समुदायमा कोरोना संक्रमित भेटिन थाले पछि कोरोना रोकथाममा चुनौती थपिएको छ।
उदयपुरको बेलकामा पनि समुदाय स्तरमै कोरोना देखापरेको उदयपुरका प्रमुख जिल्ला अधिकारी चक्रपाणी पाण्डेले बताए। पच्छिल्लो समय कोरोना पोजेटिभ देखिएका बेलकाका दुई जना व्यापारी रहेको प्रजिअ पाण्डेले जानकारी दिए।
