उदयपुर । नेपालमा सर्वप्रथम सबैभन्दा बढी कोरोना सक्रमित भेटिएर ‘कोरोना इपिसेन्टर’ बनेको उदयपुरमा कोरोना रोग विरुद्धको खोप लगाउन सुरु भएको छ । कोरोना रोग विरुद्धको खोप आज पहिलो दिन उदयपुर जिल्ला स्वास्थ्य प्रमुख मोहन सुवेदी र जिल्ला अस्पतालका प्रमुख डाक्टर जीवनारायण मण्डलबाट सुरु गरिएको हो ।
आज पहिलो दिन उदयपुर जिल्ला स्वास्थ्य प्रमुख सुवेदी र जिल्ला अस्पतालका प्रमुख डाक्टर मण्डल सहित १७ जना महिला र १६ जना पुरुष गरी ३३ जनाले कोरोना भाइरस बिरुद्धको खोप लगाएको उदयपुर जिल्ला स्वास्थ्य प्रमुख डा. मोहन सुवेदीले बताए।
खोप बिहान १०:३० देखी ४ बजे सम्म जिल्ला स्वाथ्य कार्यालयमा बिहिबार र शुक्रबार लगाइने, शुक्रबार चौदण्डीगढी नगरपालिकाको बेल्टार र शनीबार बेलका नगरपालिकाको रामपुर हुदै एक हप्तासम्ममा सबै पालिकामा अग्रपंतीमा खटिनेहरुलाई खोप लगाइसक्ने प्रमुख डा.सुवेदीले जानकारी दिए ।
प्रमुख सुबेदीका अनुसार पहिलो चरणको खोपमा स्वास्थ्यकर्मी , महिला स्वास्थ्य स्वयमसेविका, एम्बुलेन्स तथा शब (वाहन) चालक, कोभिड १९ को कारण मृत्यु भएका ब्यक्तिको शब ब्यवस्थापनमा खटिने सुरक्षाकर्मी र सार्वजनिक फोहोर संकलन गर्ने सरसफाइकर्मीलाइ लगाइने छ ।
सुबेदीका अनुसार पहिलो चरणमा जिल्ला भरी १२ सय जनालाइ खोप लगाइने भएको छ । प्रथम चरणको खोप सम्पन्न भएपस्चात १८ बर्ष उमेर पुरा भएका सवै नागरिकहरुलाई चरणबद्ध रुपमा खोप लगाइने डा. सुबेदीले बताए ।
अमेरिकाको अक्सफोर्ड युनिभर्सिटिले पत्ता लगाएको फर्मुला अनुसार भारत आफैले उत्पादन गरेको कोरोना विरुद्धको खोप भारत सरकारले नेपाललाई १० लाख डोज कोरोना भाइरसविरुद्धको खोप अनुदान दिएको थियो।
