उदयपुर । त्रियुगा नगरपालिका वडा नं १३ का नव–निर्वाचित वडाअध्यक्ष नवीन चौधरीले जेठ १८ गते बुधबार आफ्नो पदभार ग्रहण गरेका छन ।
नगर प्रमुख बसन्त कुमार बस्नेतबाट सपथ ग्रहण गरे पश्चात वडाअध्यक्ष चौधरीले वडा कार्यालयमा आफ्नो पदभार ग्रहण गरेका हुन ।
आफ्नो पदभार सम्हाल्दै वडाध्यक्ष चौधरीले वडा नम्बर १३ लाई सुशासनमैत्री बनाएर नागरिकहरुलाई छिटो र सहज तरिकाले सेवा प्रवाह गर्ने प्रतिबद्धता गरे ।
नवनिर्वाचित अध्यक्ष चौधरीले आफ्नो जनताका गुनासाहरुलाई सम्बोधन गर्न गुनासो पेटिका हरेक हप्ता खोल्ने र आफ्ना गुनासा सिधै राख्न वा गुनासो पेटिकामा राख्न सबैलाई आग्रह गरेका छन ।
मादक पदार्थ र लागू पदार्थ सेवन गरेर आउनेलाई वडा परिसर प्रवेशमा रोक लगाउने निर्णय गरेको अध्यक्ष चौधरीले बताए ।
वडाको शान्ती सुरक्षालाई प्रभावकारी बनाउन नगरप्रहरी समेत परिचालन गर्ने र प्रहरी बुथको स्थापना गर्ने निर्णय भएको अध्यक्ष चौधरीले जानकारी दिएका छन ।
