काठमाडौं । अमेरिकामा फेरि दुई जनाको मृत्यु भएको छ । मृत्यु कोरोना संक्रमणका कारण भएको आशंका गरिएको छ ।
कोरोना संक्रमणको इपिसेन्टर बनेको अमेरिकी राज्य न्यूयोर्कमा उनीहरुको मृत्यु भएको हो । मृत्यु हुने मुस्ताङ घर भई न्यूयोर्कको क्वीन्समा बस्ने सोनाम लामा र ज्याक्सन हाइट बस्ने थोंग्वेन विष्ट रहेको स्थानीय मिङमार लामालाई उधृत गर्दै अमेरिकाबाट पत्रकार होम लम्सालले जानकारी दिएका छन् ।
सोनाम अन्दाजी ४० बर्षका रहेका थिए । उनको आफ्नै कोठाभित्रै मृत्यु भएको जनाइएको छ । ज्याक्सन हाईटमा एक्लै बस्दै आएका उनी केही दिनदेखि बिरामी भएर घरमा आरम गरिरहेका थिए ।
फोन सम्पर्क गर्दा सम्पर्क नभएपछि उनी बसेको स्थानमा गएर हेर्दा मृत अवस्थामा भेटिएको पत्रकार लम्सालले जानकारी दिए । उनको मृत्यु कोरोना संक्रमणकै कारण भएको अनुमान गरिएपनि मेडिकल रिपोर्ट आउन भने बाँकी रहेको छ ।
झण्डै १८ बर्षदेखि अमेरिकामा बस्दै आएका सोनामको परिवार नेपालमा रहेको जनाइएको छ । उनको शव प्रहरीले लगेर गएको छ । उनका आफन्तहरु अमेरिकामा छैनन् ।
त्यस्तै झण्डै १२ बर्षदेखि अमेरिकामा बस्दै आएका थोंग्वेनको पनि ज्याक्सनहाइटमा आफू बस्दै आएको अपार्टमेन्टमा मृत्यु भएको हो । थप विवरण आउन बाँकी रहेको छ ।
अमेरिकाका लागि राजदूत डा. अर्जुन कार्कीले घटनाको पुष्टि गरे पनि पूर्ण विवरण आफूलाई आउन बाँकी रहेको बताएको पत्रकार लम्सालले जानकारी दिए ।
यसअघि पनि न्यूयोर्कमै अर्का एक जना नेपालीको कोरोना भाइरसको संक्रमणका कारण निधन भएको थियो ।
