गाइघाट। त्रियुगा नगरपालिकाले नगर भित्रका भूमिहीन, अति बिपन्न, दलित/जनजाती परिवारहरुलाई घर जग्गा वितरण गर्ने भएको छ ।
दुई बेडरुम, एक किचन र एक शौचालय सहितको घर बनाएर नगर भित्रका अति विपन्नहरुलाई घर जग्गा बितरण गर्न लागेको हो ।
करिव साडे दुई करोडको लागतमा ३५ बर्ष ज्ञारेन्टी भएका ५० वटा भुकम्प प्रतिरोधात्मक घर बनाएर बितरण गर्न लागिएको नगरपालिका मेयर वसन्त कुमार बस्नेतले जानकारी दिए ।
अवास निर्माण गर्नका लागि ह्याबीट्याट फर ह्युम्यनीटी इन्टरनेशनल नेपाल र मानवअधिकार र बाताबरण बिकास केन्द्र (हुरेण्डेक) सँग नगरपालिकाका प्रमुख बसन्त बस्नेत र प्रमुख प्रशासकीय अधिकृत मान बहादुर वनले सम्झौतामा हस्ताक्षर गरेका छन ।
आईतवार एक कार्यक्रमका बिच अवास निर्माण परियोजनाको सम्झौता पत्रमा ह्याबीट्याट फर ह्युम्यनीटी इन्टरनेशनलका तर्फबाट राम बहादुर श्रेष्ठ तथा हुरेण्डेकको तर्फबाट शंकर थापाले हस्ताक्षर गरेका छन ।
सम्झौता पत्रमा हस्ताक्षर गर्दै नगर प्रमुख बस्नेतले विपन्न समुदायको उचित बसोवासका लागि आवास निमार्णका साथै शिक्षा, स्वास्थ्य, खानेपानी, तथा सिँचाईजस्ता सम्पुर्ण क्षेत्रहरुमा प्राथमिकताका साथ काम गर्ने उल्लेख गरे ।
भुमिहिन, सुकुम्बासी, दलित, आदीवासी र पिछडा सामुदायको जीवन स्तर उकास्न नगरपालिकाले सीपमुलक स्वरोजगार कार्यक्रम, साना किसान तथा युवा उद्यमशीलता जस्ता कार्यक्रमहरु ल्याएर जिवनस्तर उकास्ने कामको सुरुवात गरिसकेको मेयर बस्नेतले बताए ।
उनले भने, ‘भौतिक पुर्वाधार मात्र नभई जनताको आर्थिक जीवनस्तर माथि उकास्ने र उनीहरुलाई स्वरोजगार बनाउने पक्षमा र नगरलाई हरेक दृस्टीकोणमा आत्मनिर्भर बनाउनेमा मेरो योजना र ध्यान केन्द्रीत छ ।’
