उदयपुर : उदयपुरको छुट्टा–छुट्टै ठाउँमा बिहीबार ट्याक्टर दुर्घटना हुँदा २ जनाको ज्यान गएको छ । उदयपुरगढी गाउँपालिका २ गेर्खेमा प्र.१–०२–००२.त.९६१ नम्बरको ट्याक्टर र रौतामाइ गाउँपालिका १ डहरमा प्रदेश.०३–००१ त. ८१९० नम्बरको ट्याक्टर दुर्घटना हुँदा २ जनाको मृत्यु भएको हो ।
उदयपुरगढीबाट ताप्लीतर्फ जाँदै गरेको उक्त ट्याक्टर आफैं अनियन्त्रित भइ रोडबाट ५० मिटर तल झरेको र लिम्चुङ्गको गाउँपालिकाको डहरमा मेलामा गएको ट्रयाक्टर रौतामाई डहरस्थित भित्री सडक खण्डमा अनियन्त्रित भई सडकमै पल्टिएर दुर्घटना भएको जिल्ला प्रहरी कार्यालयका सूचना अधिकारी डिएसपी राजन चापागाईले जानकारी दिए ।
दुर्घटनामा भोजपुर हतुवागढी गाउँपालिका २ का १९ वर्षीय चालक निरज मगर र रौतामाई गाउँपालिका १ डहरका ४० वर्षीय चक्रबहादुर तामाङको निधन भएको छ ।
दुर्घटनामा घाइते भएका ताप्ली गाउँपालिका २ का २२ वर्षीय रमेश श्रेष्ठ, रौतामाई १ का १८ वर्षीय मनिषा तामाङ र सोही ठाउँका २३ वर्षीय सुरेश तामाङलाई थप उपचारका लागि विराटनगर पठाइएको छ ।
